Kleine Wanderung Nachdem d` Chind vo de grosse Wanderig scho lang us de fädere gsi sind und sich uf de Wäg gmacht händ sind di chlinere Chind gweckt worde. Scho voller Vorfreud händ villi gar nöme müese gweckt werde. Nacheme gmüetliche z`Morgä hämmer üs denn uf de Weg richtig Esterliturm gmacht. Bevor mer bi dem 45 Meter höchä Ussichtsturm acho sind hämmer aber de ganz Morgä müese wandere. Ohni Problem händ d`Chind diä Strecki überwunde und so händ si sich de z` Mittag bim Esterliturm redlich verdient gha. Au uf de Turm händs natürlich derfe. Bi guetä Sichtverhältnis gseht mer det obe bis uf Dütschland. Mit gstärkte Chräft simmer nach de Mittagspause wiitergwanderet. Dä Waldweg wommer igschlage händ isch immer wieder ufe und abe gange, und so sind diä meischte Chind froh gsi, wommer ändlich zrugg im Lagerhuus gsi sind. Zumene chräftige Zigizagi häts aber trotz de müede Bei glanget. Nachem z` Nacht isch de Esssaal umgstuelet worde. En Kinoobig isch ufem Programm gstande. Bi Asterix & Obelix händ`s sich all gmüetlich gmacht und d Müedigkeit hät sich bim eint oder andere bemerkbar gmacht. Erschöpft sind nach derä astrengende Wanderig und dem spannende Film all Chind und Leiter gern in Schlofsack gschloffe. Mäde & Hägi