Rollenspiel

Amene schöne, sunnige Tag sind alli Chinde durch sanfti Kläng erweckt worde. Scho bald drufab hend sich d Chinde und d Leiter en feine Z’morge gönnt. Nachere churze Ruhepause isches denn au Ziit worde für ihres erste Abentür, also hend sich alli ihri Sache packt und sind loszoge. Über Strasse und Waldweg sind sie geilt, zum so schnell wie möglich de Schlüssel z gfinde, wo ihne sött d Truhe uuftue mitem grösste Schatz dine wo sie sich je erträumt hend. Ufem Weg hend sie zwar viel Hinderniss gha, aber eusi tapfere Forscher hend alli de Schlüssel gfunde. Und scho isches Ziit worde für e Stärchig am Mittagstisch. Z’fride sind sich die Forscher vo ihrem Abentür am erhole, wo plötzlich s Chaos usbricht. Trurigi Chinde, verstörti Tier, ängstlichi Musiker, es ratloses Filmteam und en völlig ufglöste Indiana Jones. So öpis hets na nie geh. Gott sei Dank hend die junge Forschre sofort reagiert und im schöne Schlangethal wieder für Friede und Ordnig gsorgt. Da defür hend sie denn au e feini Belohnig becho. Nach somene strenge, aber au erfolgriche Tag hend sich eusi Forscher i ihrne Gruppene versammlet und de Abig so na chli gnosse. Fascht scho wie innere Gruppestund. Und während sie gmüetlich durch de Wald spatziert sind hend sie au na gad amene Maitli chöne helfe, ihres verlore gangene Krokodil z sueche und z gfinde. Glücklich über de gmeistereti Tag sind denn alli Forscher id Federe ghüpft

Ramona & Romana