Es war einmal…

Das isch üses Motto gsi für dä hüttigi Ältischtä-Tag. Aagfange het dä ganzi Spass mit Weckmetode à la Wasserpistole. Nödemal 5 Minutä spöter sind alli Chind mit verschlafenem Gsichtli uf dä Platz gströhmt und händ sich wahnsinnig über e langi halbstund Früehsport gfreut! Klassewiis sind d Chind übers ganze Areal ghetzt worde und händ näbetbii grad au no dä bodä ächli nöcher känneglernt (in Form vo Liegestütze und Rumpfbüüge). Nacher isches im Ässsaal kunterbunt zue und her gange. Es händ sich nämli alli Ältischtä verkleidet. s Schneewittli und ihri Zwergli, s Dornrösli, Goldmarie, dä Froschkönig und sini Prinzässin und no vieli anderi Märlifigure sind verträte gsi. Sie händ nachem Z'Morge allne Chind en eimaligi Glägeheit bote, chli dur d Luft z Flüüge(miteme sogenannte Sprungtuech). Da nöd all gliichziitig händ chöne id Luft gspickt werde, hät sich die ander Hälfti mit Indiacca, Fuessball und Blachevolleyball d Ziit vertribe.

Z'Mittag hets ganz traditionell Fischstäbli geh (natürlich vo dä Ältischtä kochet) und nödemal zwei Stund spöter isch diä eigentlichi Useforderig aagstande: dä OL! I chliini Grüppli ufteilt, händ sie sich uf dä Wäg gmacht und gmerckt, wie wiit üses Areal vom Dorf entfernt isch. Dä Wäg isch mit vielne verschiedne Pöschte , wo öbbis mit Märli z'due gha hend, ufglockeret worde. Zum Bischpiil hät am Aschenputtel sin Schueh müesse gfunde werde, dä Froschkönig isch nachgahmt worde und mer isch uf Tauchstation gange, zum dä vergifteti Öpfel vom Schneewittli gfinde.

Nachem Z'Nacht isch Zauberei aaseit gsi. D Chind händ en Zaubertrank überchoo und sind verwandlet worde. Und zwar nöd i Irgendöbbis, nei, sondern d Buebe sind zu Meitli worde und umgekehrt! D Meitli händ dänn glernt wie mer sich als Bueb korrekt verhalted. Das heisst, ihne isch zeiget worde, wie mer als Maah richtig lauft, in-Gitt-ine Ässe i sich ine stopft und no vill meh. D Buebe hend Unterricht im Massiere, Nägel aamale, Gsichtsmaske ufträäge, ect. übercho. Aaschlüssend sind sie wider zrugg verwandlet worde und händ denn au diä offiziell Erlaubnis überchoo, sich ihre wohlverdienti Schönheitsschlaf z gönne.

…und wenn sie nicht gestorben sind, dann leben sie noch heute!

Ältischtä 07/08