Grosse Wanderung

Am Morgä am füfi hämmär üsi Wandärfründä sanft us dä Fädärä gholt. Nachdäm alli wach gsi sind hämmär idä Chuchi nu schnäll zmörgälät & sind dänn abmarschiärt. Nach drüähalb stündigäm mega strängäm Marsch simmär völlig undärchüält idä Rigi obä acho. Nachdäm mär üs det mitärä feinä Ovi ufgwärmt händ, hämmär üsä Gepäck vom Bähnli abgholt. Mir sind dänn mitäm Gepäck a üsä Schlafplatz nämmli ä deckti Füürstell, womär iipackt händ, acho. Det hämmär üs friedlich iigrichtät und diä schön Uussicht gnossä. Ufäm Füür hämmär dän feini Buio kochät und am spötärä Abig häts dänn nu Ravioli gäh wo d Chind sälbär gmacht händ. Nach äs bitzli Jassä und zämä sii, simmär i üsi Schlafseck krochä und händ ä chalti Nacht verbracht.

Am Morgä druf, wommär wiedär verdwachä sind, hämmär üsä Platzt ufgruumät und sind wiedär abgloffä. Nach zwei stündigäm Marsch simmär z Goldau wiedär iitroffä. Det undä hämmär dänn alli Zmittag gässä und sind id Badi am Ägärisee gangä.

Freundliche Grüsse Fürscht