Tagesbericht vom Montag: 25.Juli 2005

Hüt Morge hämer müssä früh ufstoh und zwar am halbi 8i. Nochem zMorge sind dChind i Gruppe iteilt worde und äs ischs wiiter gange mitem Judge Day (Gangster Jagd).

Bi dem Spiel ischs drum gange, di als Gangster verkleidete Leiter i ihrem Revier zfange und dänn zum Richter zbringe. Äs sind 8 Gangster uf 4 Revier verteilt gsi, sZiel isch gsi, dass jedi Gruppä möglichscht viel Gangster cha fange und zum Richter bringe. Nochem lange suechä und umespringe häts dänn am 13.00 Uhr feini Tomatä-Spaghetti mit Salat gäh.

Nach dä Mittagssiesta händ dänn alli i ihrnä Klassä dörfe sälber entscheidä wiä das si ihrä Namitag (und au ächli vum Abig) wänd gstaltä. Es paar sind zum Bispiel uf Thun go lädäle, oder go es Glace ässä, es paar Klassä händ en Beauty-Namitag oder en Spiili-Namitag gmacht. Für diä Chind wo da ufem Areal gxi sind häts dänn am 19.00 Uhr feins Birchermüesli gäh. Natürli sind au es paar mit Ihrerä Gruppä go z’Nachtässä. Diä Ältischtä sind wiä jedes Jahr mit ihrnä Leiter go zältä und chömet erscht am Zieschtig wider zrugg.

Am 9 ischs dänn für alli wiiter gangä und es hät en Easy-OL gäh. Mit verschidene Pöschte wiä: massierä, Gsichtsmassage, Tierfangis und Märli verzellä. D Chind händs richtig gnossä chli entspanne und eifach chli z’relaxä.. Aschlüssend isch dänn au scho wider Nachtrueh gxi und alli sind go pfuse.