Am halbi 10 hämer üs alli troffä am Bahnhof z’Bänggä. Mir Buurä händ üs dänn uf dä Wäg nach Kandersteg gmacht. Öpä am eis simmer dänn i üsem Areal ahcho und scho hämmer üs s’erscht mal ufd suechi gmacht: nach üsem Gepäck.. Nachdem mer dänn alli üsi Zimmer i beschlag gno händ, diä erschtä Chleider igrumt und s Huus au chli ahglueget händ, häts dänn scho s’erschte Spiili gäh. D’Chind händ müesä i verschidene Gruppe ufem Areal diversi Symbol go sueche, sich iipräge und wider uf Basis zrugg zums ufmale. Diä Gruppe wo sich am meischtä hät chöne merkä und richtig zeichnä hät gwunnä. Nachdem hämmer numal üsi Zimmer iigrumt und scho häts z’Nacht gäh. Uuuuuufeini Hörndli mit ghacktem, Öpfelmues und Chollräbli häts gäh!! Am halbi 9 hämmer üs dänn wider troffä und jedi Klass hät sich vorgstellt. Wer da guet ufpasst hät, hät fürs folgende Spili scho Pluspünkt gha. Mir händ dänn nämli s Cluedo gspillt. Nachdem mir dä Mörder entfüehrt händ (i dem Fall isches d Olä Steiner gxi) häts chönä los gah. Alli Chind händ im dunkle müesä uf em Areal umespringe und möglichscht schnell dä Mörder, d’Tatwaffe, s’Tatort und diä richtig Farb usegfinde! Nachem luschtige Spili sind dänn all Chind (meh oder weniger) müed is Bett gfalle und nach dä Guetnachtküssli vu dä Leiter händ dänn alli au guet chöne pfuse!

Chäfi, Olä, Bärbel