Am Morgä am 8i sind d’Chind unter anderem vodä Prinzessin usäm Schlaf grissä worde. Nachem ahschlüssende Zmorgä händ sie än Usflug id Vergangeheit gmacht. Allgemeini Frage übers Mittelalter, Römer, Dinosaurier, Höhlebewohner und Weltchrieg händ ihri Chöpfli zum rüche bracht.

Au am Mittag, wos ihri leere Mägli gfüllt händ, isch d Prinzessin däbi gsi und isch ächli bi dä Chind ghögglät. Doch di fridlich Stimmig isch dur än Überfall vo zwei unbekannte Täter gstört worde. Sie händ d Prinzessin packt und usäm Ässsaal zerrt.

Dä Uftrag am Namittag isch dänn gsi, usäzgfindä, vo wem und us wellem grund d Prinzessin entfüärt worde isch. Diä verchleidetä Leiter händs dur äs Rolläspiel uf diä richtig Spur bracht.

S’ Ziel vo däm isch gsi, dass d Chind durch gschickts und hartnäckigs frage, möglichscht vill über d Empfüärig usäzgfindä. S hät ä Hauptgschicht und vier chlini Churzgschichtli gha, wo möglich schnäll händ müsä glöst werdä.

Befreiig vo dä Prinzessin isch nachem Znacht los gange. Däbii sind d Gruppänä im Minutä Takt uf dä Wäg gschickt wordä. Das hät dä Kampf um dä Schlüssel, wo zur Befreiig vo dä Prinzessin benötigt worde isch, umso spannender gmacht.

Um d Chind vo ihrere Kampflust wieder abezhole, hämmer mit ihne no diversi Spieli, wiä „Tschieiei“ oder „Laurenzia“ gmacht.

Und dänn häts au scho wieder gheisse: Sleep well!

Petra, Sabsi H. & Anita