Samstag, 26. Juli 2003

Am morgä am 8ti sind d JTB-ler mit Musig gweckt wordä. Nachem feinä Z’morgä häd s obligatä Leiterlispiel stattgfundä. Detä händ d Chind ufmä überdimensionale Spielfeld müssä würflä, händs halt e paar nummerä wiiter retour müässä oder mängmal hät dä Pfiel si au am Ziel, dä hundertschtä Nummer, chli nöcher bracht. Zu jederä Nummer häts en Begriff gha wo mit em demjährigä Lagermotto ztue gha hät wie zum Biischpiil: Agent, Inspektor Gadget, Blüten, Aktenzeichen XY ungelöst, Bonnie und Clyde oder üsä absolut Favorit: Diese Nachricht zerstört sich in 5 Minuten von selbst. Dänn isch scho wieder ziit gsi zum Mittagässä. Z Rahmschnitzeli, d Nüdeli und d Erbsli mit Rüäbli händ all mega fein gfundä. Dä Namittag hät dämit agfangä dass mr alli üsi Schläg ufgrumet händ und s Areal gfötzlet wordä isch. Nach derä Aschträngig hämmer d Hygienitis durägführt. I dem Spieli is drum gangä dass all möglischt dräggig wordä sind. Natürli häts nachem dräcklä ä rächti Wasserschlacht brucht! Nachem Z’Nacht hät d Leitershow stattgfundä. S Highlight sind d Specialguests Six-Pägg gsi wo tatchräftig d Show unterstützt händ i dem dass sie ihri Lieder gspielt händ. Natürli händ d Chind nach derä super Show nümmä is bett wellä und händ lutstark um Zuegab gruefe. D Leiter händ sich am Schluss dä doch no chönnä duräsetzä und mit dä Nachtrueh isch dä spannend und rockig Tag au schowieder verbi gsi.

by Bärbel, Nici, Chrisi und Misch