SoLa Gluringen Jugendteam Bänggä

Tagesbericht vom Dienstag 25.07.2006 Wandertag und Stromusfalltag

Am Morge am Sechsi sind üsi alte Bergtouriste in git ine ufgstande und händ z’mörgelet, bevor sie sich uf ihri fürstlichi Wanderig begeh händ. Dä Wanderernachwuchs häts gliiche gmacht, aber natürli erst zwei Stund spöter. Dä fein Lunch und viel z’tringgä sind in Ruggsack ipaggt worde, jedefalls bi dä meiste.
Nachher ischs los gange bi herrlichem Wetter. Kuum sind mer bi dä Badi (nur) verbi gloffe sind au scho diä erste Zunge am Bode na gschleicht worde. Im schattige Wald ischs dänn bergufwärts gange. Uf em Wäg sind mer a vielne schönä „Heimetlis“ mit Bänkli und Brunne verbi cho. Gäg di viertel ab Zwölfi häts dänn au scho bin ere schöne Aussicht ä Mittagspause geh. Däna ischs wieder bergabwärts gange i Richtig Lagerareal, wo mär gäg diä Vieri acho sind.
Uf die halbi Siebni sind all Chind zum z’Nacht bstellt gsi. Dä isch aber mit erä Stund verspötig i troffe, will us no unklare Gründ ganz Gluringä für ä churzi Ziit kei Strom gha hät. Zur Überbrückig sind dänn jedoch es paar wohlbekannti Lieder agstumme worde.
Dä guet z’Nacht hät dänn i üsne Bergwanderer wieder neui Energie gweckt, dämit sie spöter bin äräm gmüätliche Filmabig (Himmel und Huhn) nöd grad igschlafe sind. Druf abe sind aber all froh gsi is, wos händ chönä is weiche Bett ligge.

Rüdi