Tagesbericht 21.07.2014 Die spinnen die… Bären!!! Dä Asterix und dä Obelix hend gester wie jede Sunntig Abig en gmüetliche Spaziergang im Wald gmacht. Plötzlich hets wie us chüblä ahgfange regnä. Da sie aber scho zwiit im Wald ihne gsi sind, hend sie nöme chöne zrugg goh. Zum Glück händ sie en liebe Bär troffe wo ihne unterschlupf ih sinere trochene Höhli ahbote het. Während de Warteziit hend sie sich mitem Bär chöne ahfründe, und als Dank hends ihm bim Abschied ahbote de morgig Tag mit ihm zverbringe. … Mit dem Gschichtli hendmer üsi Chind am Sunntig abig is Bett tue. D Vorfreud uf de Mäntig isch somit gross gsi und Türe für bärestarchi-Träum offe... ;-) D´Gummibärebandi hät am Morge d´chind usem bettli grüttlet. Nacheme stärchende zmorge hämmer üs bimene Postelauf ufem Areal mit de Theme Integration, Mobbing, Vertraue und Fründschaft uf verschiedeni Arte usenand gsetzt. Am Namittag hämmer üs denn ufd Suechi vode Kleopatra gmacht. Die isch nämmli bim Indiaca-Spiele eifach entfüehrt worde! Mit vereinte Chräft hend sich d chind ufd Suechi gmacht und mit Hilf vo schnelligkeit, guetem löse vo Ufgabe und richtigem Charteläsä d Kleopatra us ihrem Versteck befreit. Miteme Bärehunger ischs denn wieder zrugg ufs lagerareal gange, wos en super feine znacht geh het. Am Abig simmer denn zum gmüetlichere Teil überegange. Bimene Easy-OL hetmer chöne entspanne, lache und de Abig usklinge lah. By Tamara und Nicole