Kleine Wanderung Nacheme churze chräftige Z’Morgä simmer mit 80 Nasä richtig Savognin gloffe. Det hämmer derfe e Strecki mitem Sesselilift zrugglegge. Aschlüssend simmer e churzes aber steils Stuck bis zu dä Mittagspause gwanderet. Mit feine, selber grillte Würscht im Mage ischs denn wiitergangä. Es isch ufä & abe gangä, a Flüss verbii und zwüschet Felswänd dure. Endlich hämmer denn de langersehnti Schlofplatz erreicht und händ grad agfange mit Zält ufbauä. Ravioli und Brot händ au de letschti Hunger gstillt. Bim Spiil & Spass mit Marc händ sich d Chind köschtlich amüsiert. Ufgrund vo de allgemeine Müedigkeit isch aber früeh Nachtrueh gsi. Am nächstä Morgä sind alli mit gfüllte Energiereservä ufgwachet. Nach churzem Ufruume und Z’Morgä hämmer üs uf de Heiweg gmacht. Gägä Mittag simmer denn wieder im Lagerhuus zrugg gsi und endlich hät mer Ziit ka zum d Bei höchlagere. Am Namitag häts zur Abchüelig no en chliine Wasser-OL geh. Bi de aschlüssendä Wasserschlacht isch keis Hoor troche blibe. Bim fascht scho traditionelle Easy-OL am Obig händ sich d Chind nomol chönä vo de Strapaze erhole. vom Mäde und Kili der Panzer